ગાંધીનગરમાં પાર્ટીના પ્રદેશ કાર્યાલય ‘શ્રી કમલમ’ ખાતે ભાજપના રાષ્ટ્રીય અધ્યક્ષ જેપી નડ્ડા સાથે ગુજરાત ભાજપના અધ્યક્ષ સી.આર.પાટીલ દ્વારા બેઠક યોજવામાં આવી હતી. જ્યારે ગઈકાલે દેશના ગૃહમંત્રી અને ભાજપના દિગ્ગજ નેતા અમિત શાહ સાથે ગુજરાત વિધાનસભા ચૂંટણી ને લઈને બેઠકોનો દૌર યોજાયો હતો. ગુજરાત વિધાનસભાની ચૂંટણી જેમ જેમ નજીક આવી રહી છે તેમ તેમ રાજકીય પક્ષોનો પ્રચાર પણ વેગ પકડી રહ્યો છે.
પંજાબમાં મળેલી જોરદાર સફળતાથી ઉત્સાહિત આમ આદમી પાર્ટીના કન્વીનર અને દિલ્હીના મુખ્યમંત્રી અરવિંદ કેજરીવાલ ગુજરાતમાં સતત સક્રિયતા દાખવી રહ્યા છે, જ્યારે ભાજપ વતી ખુદ વડાપ્રધાન નરેન્દ્ર મોદી અને ગૃહમંત્રી અમિત શાહ દ્વારા ગુજરાતમાં પ્રચાર અભિયાન સંભાળ્યું છે. દરમિયાન, ભાજપના પ્રદેશ અધ્યક્ષ સી.આર. પાટીલે શનિવારે એક ટીવી ચેનલને આપેલા ઇન્ટરવ્યુમાં દાવો કર્યો હતો કે ભાજપ પાસે કેટલાક “બ્રહ્માસ્ત્રો” છે,
જેમાં “વડાપ્રધાન નરેન્દ્ર મોદીની લોકપ્રિયતા અને કેન્દ્રીય ગૃહ પ્રધાન અમિત શાહનું માસ્ટર પ્લાનિંગ” સામેલ છે. જે ભાજપ ને ગુજરાત વિધાનસભા ચૂંટણી જીતવામાં મદદ કરશે. તેમણે આમ આદમી પાર્ટી તરફથી ભાજપને કોઈ પણ પડકારનો ઈન્કાર કર્યો હતો. સીઆર પાટીલે કહ્યું કે, આમ આદમી પાર્ટી સુરત મહાનગરપાલિકામાં 27 બેઠકો જીતી શકી છે કારણ કે “PAAS (પાટીદાર અનામત આંદોલન સમિતિ)ના કાર્યકરો”ને ટિકિટ આપવામાં આવી હતી.
પાટીલે કહ્યું કે ભાજપમાં ટિકિટની વહેંચણી મોદી અને શાહ પર છોડી દેવામાં આવશે. “મેં તમામ ઉમેદવારોના બાયોડેટા તેમને સોંપવાનું નક્કી કર્યું છે. તેઓ દરેક કાર્યકર્તાને જાણે છે…અમે સમગ્ર નિર્ણય તેમના પર છોડી દઈશું. આ રીતે, જેને ટિકિટ ન મળે તેમને પણ અફસોસ નહીં થાય. ટીકીટનો નિર્ણય દિલ્લી મોદી શાહ પાસે મંજૂરી માટે જાય અને ત્યાંથી જ નક્કી થાય તો કોઈ કાર્યકર નિરાશ થશે નહીં અને તેમને ટીકીટ ના મળ્યાનો અફસોસ પણ થશે નહીં.
ભાજપ અધ્યક્ષે કહ્યું- કોંગ્રેસનો જૂનો બેઝ વોટ શેર હવે રહ્યો નથી. વિપક્ષી કોંગ્રેસ વિશે, તેમણે કહ્યું કે તેની પાસે હવે 35 ટકાથી વધુ બેઝ વોટ શેર નથી, પરંતુ “તેનો 15-18 ટકા વોટ શેર હજુ પણ સુરક્ષિત છે”. આનાથી કોંગ્રેસ “નિઃશંકપણે નંબર 2” છે. પાટીલે કહ્યું કે ઐતિહાસિક રીતે ગુજરાતમાં ક્યારેય ચૂંટણીમાં ત્રિકોણીય હરીફાઈ જોવા મળી નથી. તેથી, આમ આદમી પાર્ટી ન તો સ્પર્ધામાં છે કે ન તો તેની તરફથી કોઈ પડકાર છે. ભાજપ ફરીથી ગુજરાત વિધાનસભા ચૂંટણી જીતશે અને સરકાર પણ બનાવશે.
પાટીલે કહ્યું કે, “કોંગ્રેસ ઉભા થવાનો પ્રયાસ કરી રહી છે, પરંતુ કેન્દ્ર અથવા સ્થાનિક સ્તરે કેટલીક ઘટનાઓને કારણે… તે આવું કરી શકતી નથી… તે તેના માટે એક મોટો પ્રશ્ન છે,” તેમણે કહ્યું. પાર્ટી તરફથી રાજ્યના આગામી મુખ્યમંત્રી માટે કોણ ચહેરો હશે તે અંગેના પ્રશ્નના જવાબમાં, તેમણે કહ્યું: “મુખ્યમંત્રી ભૂપેન્દ્ર પટેલે સારું કામ કર્યું છે અને બીજી ટર્મ માટે તેનું પુનરાવર્તન કરવામાં આવશે.” આમ ગુજરાત ભાજપ અધ્યક્ષ દ્વારા ગુજરાત વિધાનસભા ચૂંટણી માં ભાજપ નો ચહેરો પણ જાહેર કરી નાખ્યો અને મુખ્યમંત્રી ના દાવેદાર પણ જાહેરકારી નાખ્યા.
